البساطة في المظهر الخارجي

كتبت:- هدير عادل
 البساطة في المظهر الخارجي
ممكن كل بنت تكون جميلة علي طريقتها ..ونسبة كبيرة من الجمال ده تتلخص في الجمال الداخلي " الروح " , طيب خلينا نقول باسلوب سهل الفهم الجمال نسب وربنا خلق الجمال في كل حاجة حوالينا ..خلق الوردة الحمرا والصفرا والروز والزرقا ..نوع ما بين الفاتح والغامق ...لو تاملنا في الكون حوالينا هنلاقي الطويل والقصير, وكل منهم بيناسب المكان اللي هو فيه ..يعني انا شخصيا بترجم خلق ربنا للشجر الطويل علي سبيل المثال لصد الرمال والاتربة وحتي في اوقات بيكون اختلاف الاطوال ده رحمة للكائنات اللي بتتغذي عليها زي الزرافه مثلا.
اللي اقصد اوصلهولكم بالمقدمة دي ان مفيش حاجة ثابتة او معيار واحد محدد للجمال ..او ان في حد حلو وحد لا ..في حاجة اسمها انسان مهندم و نظيف مقبول..وفي انسان مهمل في نفسه ومظهره غير مقبول. وبرضو لازم ناخد في اعتبارنا ان اللي يعجب حد مش ضروري يعجب التاني ..وعشان كده لازم نحترم بعض ..يعني لو واحدة بتلبس زي ما بتقول " اخر موضة " وبتشوف واحدة وتقول عليها " بلدي او مبتعرفش تلبس او غيره من الالفاظ اللي بتجرح غيرنا واحنا منعرفش ايه ظروفه مثلا ,,,عشان كده خلونا نتفق علي قاعدة مهمة جدا وهي 

قاعدة رقم 1 : كل واحد يخليه في حاله انت متعرفش اللي قدامك جواه ايه او هو شايف ايه ولو متقدرش تساعده بالنصيحة المهذبة اللي متجرحهوش بلاش نظراتك وكلامك عليه 

وقاعدة رقم 2 : لاي حد نفسه يكون بمظهر جميل قدام الناس ,,نصيحة خليك جميل داخليا كمان عشان ده ضروري ليك ولغيرك.
وقاعدة رقم 3 : ثق بنفسك اولا واخيرا,,هدومك ومظهرك الخارجي دي مكمل ليك ولشخصيتك , لكن مش هي دي بس انت ..انت فيك وبايدك حاجات تانية كتير.
وقاعدة رقم 4 : احرص دايما انك تكون لابس لبس بتحبه وبترتاح فيه ..واختار خامات جيدة ومش شرط يكون لبسك غالي عشان يبقي حلو بشوية اهتمام منك بالخامات اللي بتنقيها. وبنظافة وكي اللبس هتبقي اخر تمام.
وقاعدة رقم 5 : في ناس ممكن يكون عندها مشكلة بسيطة جدا وهي " الالوان "..عاوز تلبس لبس متناسق خليك مع الطبيعة بص للاشجار مثلا وهتعرف الالوان اللي تمشي مع بعضها ( الاخضر مع البني ) ..وشوف بقي الورد عالشجر كمان وده بالاخص للبنات من الوان الورود .
قاعدة رقم 6 : احرص عالتنوع في اختيارك للبسك , يعني مش كل ما تنزل تشتري تجيب نفس اللوك او الخامة او حتي اللون .. خلي عندك طقم للمناسبات الرسمية والاجتماعية وللرياضة وبالنسبة للجامعة مفيش منع نزود حاجة بسيطة في الكاجوال وكلنا عارفين مدي احترامنا ليه
قاعدة 7 : مش مرتبطة اوي باللبس ..بس مادمنا بنتكلم عنه وعن المظهر الخارجي وازاي هو مهم ..يا ريت متنساش كل يوم قبل ما تنزل من بيتك تكون مجهز بسمتك ايون دي " تبسمك في وجه اخيك صدقة " ..وخليك ايجابي بلبسك وبتعاملاتك وبابتسامتك حتي لو جواك هموم الدنيا كلها ...وخدها نصيحة اخيرة ..مفيش حاجة تستاهل وحاول تتبسط باي شئ ولو بسيط ..ولو بالالوان وباللبس ومتنساش الطبيعة دور عليها و" تبت "او امسك فيها ..كل ده هيفرق معاك كتير..صدقني