ازاي تتصرف اثناء العزومات

كتبت :- هدير عادل 

احنا هنعرض عليكو شوية حاجات كده خفيفة مهم جدا اننا نبدا نعرفها لو منعرفهاش, ولو نعرف بعضها ممكن نكون بنعمل حاجات صح وحاجات غلط , عشان كده حبيت اعرض لكم جزء منها:
اذا كنت معزوم او بتاكل في مكان عام يفضل مراعاة الاتي :

1-  لو معزوم عند حد مينفعش تبدا في الاكل الا لما صاحب العزومة يبدا.
2-  لما نقعد علي الاكل الافضل اننا نقعد وضهرنا مفرود ومنسندش بدراعتنا عالسفرة, يفضل تكون ايدينا موازية لجسمنا .
3- ولو احتجنا حاجة علي الترابيزة وهي بعيدة عننا الاحسن اننا نطلبها من الاقرب منها .

في مواقف حرجة ممكن نتعرض لها اثناء الاكل, ودي شوية حاجات ممكن نتصرف بيها:
1- لو في اكل وقع علي الهدوم, الافضل انك متلفتش الانظار ليك, وتحاول تشيل اللي وقع بمنديل او فوطة للسفرة                       ولو لزم الامر ممكن تبل جزء بسيط بالمية وتشيل الاكل, وممكن كمان لو الشوكة نضيفة تشيل بيها بسرعة .
2- لو العزومة في بيت وفي اكل وقع عليك , وقتها صاحب البيت ممكن يساعدك في التنظيف.
3- لو تعرضت لنوبة من العطس او " الشرقة " اثناء الاكل ممكن تستخدم المنديل, لو حسيت الموضوع هيطول وممكن الضيوف يضايقكوا , وقتها الافضل تستاذن من علي الترابيزة لحد ما تهدا وترجع تاني.
4- وكذلك لو وقع منك اكل او كسرت طبق او كوباية تعتذر وتبادر بمساعدة صاحب البيت.

ودلوقتي في حاجات يفضل انك تجتنبها ومنها :
1- من البديهيات انك متعملش صوت وانت بتاكل ده ممكن يضايق اللي بياكل معاك, ومتتكلمش وانت بتاكل                                امضغ الاول كويس وبعدين اتكلم.
2- لو معزوم في بيت حد متقومش من مكانك الا لما هو يخلص اكل .
3- ومتطلبش صنف مش موجود عالسفرة, ولو الاكل طعمه مش عاجبك متبديش كده.
4- متملاش الشوكة او المعلقة بالاكل عالاخر.
5- ومتتكلمش في اي شئ مثير للاشمئزاز عالاكل.
6- وتجنب الاحاديث الجانبية, وعند فتح احاديث يفضل ان يبدا بها اصحاب العزومة وتكون مشوقة و مناسبة للجميع.
7- لو متعرفش في موضوع معين اي معلومات بلاش تتكلم منعا للاحراج .
واخيرا , وقت الاستئذان بعد ساعتين مثلا من انتهاء الطعام عالاقل وقبل ما تمشي اشكر اصحاب العزومة وبدون مجاملات مبالغ فيها.