اسهل شاورما بيتي

كتبت:- هدير عادل 

الوجبة : ( شاورما الفراخ , وممكن نستبدلها باللحمة )

 مقادير شاورما الفراخ : من 4- 6 قطع بانية او صدور فراخ واحنا نقطعها لقطع صغيرة او متوسطة حسب الرغبة , فلفل اخضر,

 2 حبة طماطم صغيرة , بصلة متوسطة , ملح وفلفل وخل وليمون , 1 حبة جزر للتزيين , وبقدونس( مقطع صغير ).

طريقة العمل : في البداية نكون مقطعين البانيه والفلفل الاخضر والطماطم والبصل (البصل لو مفروم تمام, واللي حابب يقطعه دواير تمام بس يفككها من بعضها عشان التسوية السريعة ), قطع صغيرة متناسقة مع بعضها .
و يفضل العمل في طاسة كبيرة الحجم ونضع ملعقة من السمن ونضيف البصل ونقلب لحد ما لون البصل يبدا يتغير للون الاصفر ونضيف قطع الفراخ ونقلب كويس لحد ما اللون يتغير هيبقي ابيض ( بدا يستوي ) ,ونضيف الملح والفلفل ( ملعقة صغيرة منهم ), وبعدين نضيف ملعقة متوسطة من الخل وعصير الليمون سواء (ليمونة او اتنين ) 

  ونقلب كويس علي نار متوسطة , ونبدا نضيف الفلفل الاخضر , والطماطم , وعشان نتاكد ان الفراخ استوت ندوق حاجة بسيطة .

مهم جدااا... ممكن نسلق الفراخ او اللحمة قبل ما نقطعهم قطع صغيرة ( ولو مقطعين جاهز علي هيئة بانيه يبقي خلاص نشتغل عادي وده عشان التسوية السريعة ).

طريقة التقديم : ونبدا نغرف في طبق بيضاوي كبير مثلا , ونبدا التزيين ( باننا نحط علي جوانب الطبق بالكامل البقدونس اللي قطعناه – حاجة بسيطة – يعني نحدد الطبق او نعمله اطار بالبقدونس , وفي نص الطبق نعمل وردة بالجزر اللي نقطعه دواير رفيعة قدر الامكان ( باستخدام قطاعة الشيبسي ) , وفي النهاية بمعلقة كبيرة من زيت الذرة او الزيتون اللي يحب يرش علي الطبق عشان ده بيدي الاكل لمعة .