تجارب فيبساوية | دكتور منّة نجيب

كتبت :- د/ منّة نجيب

" عسی ان تكرهوا شیء و هو خير لكم " ..

بالاية الكريمة ده هبدا كلامی..
انا كنت ايام المدرسة حلمی ابقی دكتورة اسنان..مش صيدلانية و لا دكتورة بشرية لا اسننااااان..دخلت علمی علوم و درست فيزياء برخامتها و كيمياء و احياء وتعبت اووی فی ثانوية عامة..جبت فی ثانوية عامة 96،6% وكان مجموع حلو ايامها للعلمی العلوم و كان يدخلنی طب اسنان مستريح و اتبسطت جدا وحلمی هيتحقق بقی..
فجاة الاخبار فی الجرايد و مؤشرات التنسيق هتعلی فی علمی علوم و تقل فی علمی رياضة و المجاميع كلها زادت و بمجموعی ده مكنش ينفعنی غير طب بيطری!!!..طبعا صدمة كبيرة ليا و عشت اصعب ايام حياتی و حسيت ان مستقبلی ضاع و انی اقل من اللی حواليا و دخلت فی دوامة من الاحباط الرهيييب..ووقت كتابة الرغبات قعدت مع بابا وماما و كتبت طب اسنان فی الاول من عين شمس لاسيوط علی امل انها تجيلی..وبعدين بدانا نفكر بحرص فی اللی بعدها خصوصا مع احتمالية عالية ان مش هيجيلی طب اسنان و هترسی علی اللی بعدها..انا مكنش فارق معايا كله واحد طبعا فقلت اكتب اعلام..اما بابا وماما رفضه اعلام تمااااما و دخلنا فی ايام من المشاحنات و المناقشات..لانهم كانوا شايفين ان اعلام ملهاش مستقبل..و فكروا فی كلية الاقتصاد و العلوم السياسية..طبعا انا كنت رافضة تماما..هعمل فيها ايه؟ و ايه فايدتها؟ وهتخرج ابقی ايه؟مجالاتها ايه؟..طبعا تساؤلات و رفض منی تاااام للكلية و محاولات اقناع من اهلی بانها كلية قمة و مستقبلها احسن..المهم استجبت لرغبة اهلی و كتبتها بعد طب اسنان و بعد كده اعلام..كنت بدعی فی الصلاة بان اعلام تيجی..لانی مكنتش حاسة نفسی و لا شايفة نفسی فی كلية الاقتصاد و العلوم السياسية..وحصل يوم الاعلان عن نتيجة التنسيق..اتصلت برقم ارضی و بلغتنی صوت مش هنساه عمری"مبروك التحاقكم بكلية الاقتصاد و العلوم السياسية جامعة القاهرة"..قفلت السماعة فی وشها وبلغت البيت عندی و كل البيت فرحوا و زغاريد الا انا بكيت بشكل هستيری! وقضت اصعب اجازة فی عمری..روحت الكلية اول مرة كنت مضايقة جدااا و حاسة ان الدنيا سودة فی وشی..وكنت كل ما بروح برجع معيطة..و كنت بحاول اقنع اهلی بانی احول لاعلام! و كانوا رافضين جدا..المهم فی مرة روحت انا و صاحبتی اعلام نتفرج عليها من الداخل ..والله حسيت بان قلبی اتقبض اول ما دخلتها! و خرجت مش مستريحة تماما و شكرت ربنا انی مدخلتهاش بس ده مش معناه انی حبيت كلية الاقتصاد وقتها لا لا...بس زادت حيرتی اكتر!! اروح فين..اعلام و مش عاوزاها كمان..قضيت اول ترم فی سنة اولی فی حالة من العند مع نفسی مكنتش بذاكر اوی و كنت بكره الكلية اكتر! وكنت حاسة انی هسقط!! وعدی الترم الاول و نجحت بتقدير كمان و لاقيت نفسی الترم التانی بشتغل و بذاكر و بلتزم اكتر! و بدا حبی للكلية يزيد بشكل غريب!كنت مستغرباه جدا..و تفوقت فی سنة اولی و كملت بتفوق مش نجاح بس.. وخلصت و اتخرجت وبابا قالی روحی شوفی ترتيبك علی مستوی الكلية جايز تتعينی..وانا كنت شايفة انه استحالة و انا هشتغل برة عادی..المهم اقنعنی و روحت وحصلت المفاجاة انی هتعين معيدة فی قسم الادارة العامة..طبعا مصدقتش نغسی!!!كنت فين و بقيت فين..الحمد لله
انا دلوقتی بحب الكلية جدا و حاساها بيتی و مكان عملی و فعلا بقول اذا رجعونی بالعمر كنت هدخل الكلية ده و لاقيت نفسی فيها و طورت فيا وفی شخصيتی جدا و علمتنی كتيييير اوی

الدروس المستفادة يا شباب:
- محدش عارف الخير فين..
-لو علمتم الغيب لاخترتم الواقع..
-حسن الظن بالله..
-التعايش مع الواقع..
-اذا حلم ضاع مش اخر الدنيا ..ثق فی قدراتك انك تقدر تصنع حلم جديد و تحققه..
-عسی ان تكرهوا شیء و يجعل الله فيه خيرا كثيرا..

 مفتاحيه :

تجارب فيبساويه, سياسه واقتصاد, اقتصاد وعلوم سياسية, فيبس, feps, 4p